Þann 16. maí næstkomandi verður fyrirtaka í Héraðsdómi Vesturlands í máli sem héraðssaksóknari hefur höfðað á hendur manni á fertugsaldri, búsettum í Borgarnesi. Maðurinn er ákærður fyrir tilraun til hlutdeildar í kynferðisbroti gegn barni. Reyndi hann að fá konu sem hann var í kynferðislegu sambandi við til að misnota fimm ára gamlan son hennar og sýna sér athæfið í gegnum snjallsíma.
Tekið skal fram að konan varð ekki við óskinni. DV hefur ekki heimildir fyrir að hún hafi verið ákærð í málinu og óvíst er að hún teljist hafa brotið af sér þó að parið hafi viðrað hugleiðingar og óra um kynferðislega misnotkun á barni.
Maðurinn neitaði sök við þingfestingu málsins. Svo virðist sem maðurinn hafi gælt við hugsanir um að misnota önnur börn og einhver misnotkun hafi þegar átt sér stað. Skjáskot sem ætlað er að sýni textaspjall parsins um slíkt hafa verið í einhverri dreifingu og hafa nú ratað til DV.
Textaspjallið varðar önnur börn en son konunnar sem kemur við sögu í áðurnefndu dómsmáli, það er annars vegar dóttur þessarar konu og svo hugsanlega tvo syni mannsins.
Óhætt er að segja að textaspjallið vekur óhug. Það lýsir miklum hugarórum um kynferðislega misnotkun á börnum og virðist jafnvel benda til að einhver misnotkun hafi átt sér stað nú þegar.
Spjall þetta er ekki mikið að vöxtum en snýst meira og minna um hugaróra mannsins um kynlíf með börnum eða eitthvað því tengt. Meðal annars segir maðurinn að ungir synir hans (að virðist) hafi fengið holdris er hann snerti þá við bleiuskipti og annað því um líkt.
Sem fyrr segir býr maðurinn í Borgarnesi en móðir barnanna býr ekki þar. Hún hefur sig ekki eins mikið í frammi hvað varðar kynóra um börn og maðurinn en svarar manninum af vinsemd og áhuga þegar hann viðrar óra sína.
Það má ráða af textaspjallinu að dóttir konunnar hafi horft ítrekað á parið í samförum. Ræða þau nokkuð um það af sýnilegri ánægju.
Samkvæmt heimildum DV gerði lögregla húsleit á heimili foreldra mannsins í Borgarnesi við rannsókn málsins og lagði meðal annars hald á heimilistölvu og snjallsíma. Maðurinn hefur verið sakaður um kynferðisofbeldi gegn öllum þremur börnum konunnar, dreng og tveimur stúlkum, en rannsókn hefur ekki enn sem komið er leitt til annarrar ákæru en þeirrar sem hér um ræðir, þar sem ákært er fyrir tilraun til hlutdeildar í broti gegn barni.
