Karlmenn með ketti eru ekki vinsælir á stefnumótaforritum og eru minni líkur að gagnkynhneigðar konur „svæpi“ til hægri á Tinder ef karlmaður heldur á ketti.
Þetta kemur fram í niðurstöðum rannsóknar á vegum háskólans í Colarado.
Samkvæmt niðurstöðum rannsóknarinnar eru karlmenn sem halda á köttum líklegri til að vera hafnað af gagnkynhneigðum konum því þær upplifa þá sem „kvenlegri“ og „taugaveiklaðri“.
Önnur rannsókn rennir frekari stoðum undir þessa kenningu. Háskólinn í Nevada framkvæmdi rannsókn árið 2015 og sagði yfirgnæfandi meirihluti kvenkyns þátttakenda að þær myndu frekar vilja byrja með karlmanni sem ætti hund frekar en kött.
Cosmopolitan greindi frá þessum niðurstöðum og ræddi við nokkra karlmenn sem eiga ketti.
Nathan Kehn, 33 ára, á fjórar kisur og sagði að þær hefðu verið orsakavaldur síðustu sambandsslita. Hann og fyrrverandi kærasta hans voru að íhuga að flytja inn saman og hún bað hann um að losa sig þá við kettina, hann neitaði og er núna einhleypur.
Aðrir karlmenn sem miðillinn ræddi við höfðu svipaðar sögur að segja, að það sé litið á kattahald þeirra sem galla frekar en kost í samböndum.
