„Ég, Guðrún Katrín, er mamma Magnúsar Andra sem lést af fíknisjúkdómi þann 12. febrúar 2023,“ segir Guðrún Katrín Sandholt í einlægri færslu á Facebook, sem hún gaf DV góðfúslegt leyfi til að deila.
Sonur hennar, Magnús Andri Sæmundsson, var aðeins 19 ára gamall þegar hann lést.
„Þann 12 febrúar síðastliðinn, breyttist líf okkar fjölskyldunnar að eilífu. Magginn okkar lést af fíknisjúkdóm. Hann var aðeins 19 ára gamall og allt lífið framundan. Hann þráði ekkert heitar en að verða edrú,“ segir Guðrún Katrín og rifjar upp síðustu daga sonar síns.
„Síðustu dagar Magga voru ágætir, hann var á fíknigeðdeild,fór þaðan yfir að stunda fundi í 12 spora samtökum, var kominn með trúnaðarmann og ætlaði sér að byrja stunda 12 spora prógrammið af fullum krafti. En það var ekki nóg, hann komst ekki inn í langvarandi meðferð vegna biðlista, hann var ekki nógu geðveikur fyrir fíknigeðdeild.“
Kom alls staðar að lokum dyrum
Guðrún Katrín segist hafa leitað alls staðar að aðstoð fyrir son sinn, sem þurfti aðstoð og utanumhald, en hún kom alls staðar að lokuðum dyrum.
„Ég mamma hans, hringdi á alla þá staði sem ég mögulega vissi um að koma honum einhversstaðar inn, þvi jú að koma úr ópíóða neyslu er bara alls ekkert grín, það er ekki nóg að fara nokkra daga inn á Vog eða geðdeild, það þarf langa eftirmeðferð og utanumhald. Hann fann fyrir fordómum og skömm, hann var fárveikur af sínum sjúkdóm. En kom alls staðar að lokuðum dyrum. Ef hann hefði verið með krabbamein, eða sykursýki, þá hefði hann fengið alla þá hjálp og aðstoð, en ekki með fíknisjúkdóm, sem er viðukenndur af alþjóða heilbrigðisstofnun.“
Um Magnús son sinn segir Guðrún Katrín: „Maggi minn var með stærsta hjartalag, og besta faðmlagið, hæfileikaríkur, stórgáfaður. Ég sem móðir hans skil ekki a fhverju það er ekkert gert í þessum málum, fyrir þessa ungu krakka. Alltof mörg börn hafa látið lífið bara á þessu ári, og enginn talar um það.“
Segist Guðrún Katrín ekki skammast sín fyrir hvernig andlát sonar hennar bar að:
„Eigum við sem foreldrar bara að þegja og skammast okkar fyrir að börnin okkar hafi látist af völdum fíkniefna. Nei barnið mitt var með sjúkdóm, ég skammast mín ekki. Ég Guðrún Katrín er mamma Magnúsar Andra sem lést af fíknisjúkdómi þann 12.febrúar 2023.“
