„Aðeins um þá fáránlegu hefð að meiða og niðurlægja vin sinn sem er að fara að gifta sig. Arfleifð skaðlegrar karlmennsku virðist lifa góðu lífi í steggjunum miðað við skilaboð sem ég hef verið að fá.

Legg til að vinahópar sem eru að skipuleggja steggjanir leggi metnað í ánægjulegar og skemmtilegar steggjanir. Og sýni í alvöru hversu dýrmæt vináttan er og hversu vænt ykkur þykir um vin ykkar sem er að fara að gifta sig,“ segir Þorsteinn V. Einarsson í færslu á Facebook-síðu Karlmennskunnar.

Rifjar hann um þegar hans vinahópur steggjaði vin fyrir tuttugu árum og hugsuðu hvernig væri hægt að koma honum á óvart, gert hann skelkaðan og helst gengið fram af honum. „Gert hann hræddan, gert hann að athlægi fyrir framan fjölmenni og annað með tilgang að niðurlægja. En auðvitað allt í umhyggju. Eða það héldum við.“

Þorsteinn segir þessa arfleifð lifa enn og hann fái reglulega skilaboð frá strákum eða mökum þeirra sem eru stressaðir fyrir steggjun sinni, stressaðir yfir hvað vinir þeirra muni láta sig gera, en þora auðvitað ekki að láta vinina vita eða vinirnir taka ekki mark á því.

Spyr hann hversu öfugsnúin slík vinátta sé. „Að vegna þess að þú ert að fara að gifta þig, fagna ástinni með ástvinum, þá ætla vinirnir að verja með þér heilum degi eða helgi og markmiðið er að niðurlægja, ganga fram af og vanvirða þarfir þínar og vilja þinn. Gjörsamlega galin arfleifð skaðlegrar karlmennsku.“

Skorar Þorsteinn á alla þá sem eru að skipuleggja steggjun að rjúfa þessa ömurlegu hefð og skipuleggja dag sem raunverulega endurspeglar hlýjan hug og væntumþykjuna sem karlmenn bera til vinar þeirra. „Ef hann fílar að láta dúndra í sig paintball kúlum og gera sig að fífli, gerið það þá. En líklega vill hann bara verja með vinum sínum góðri stundu og gera eitthvað skemmtilegt saman. Ekki láta meiða sig og niðurlægja.
Og plús ef þið ætlið að flippa veriði þá aðeins meira flippaðir og frumlegir en svo að klæða stegginn í kvenfetnað af því kvenlegir karlmenn eru svo mikið grín og skaðlega karlmennskan ykkar svo djúpt mótuð kvenfyrirlitningu.“

Þorsteinn óskar að lokum væntanlegum brúðgumum til hamingju og segir að vonandi auðnist þeim að eiga betri vini en svo að þeir vilji meiða viðkomandi og niðurlægja.