Åge Hareide er himinlifandi með að vera tekinn við íslenska karlalandsliðinu. Hann sat fyrir svörum í fyrsta sinn hér á landi í dag.

„Það er gott að vera hér. Fólkið hér í sambandinu er vinalegt. Þetta er gott samstarfsfólk og allir vilja það besta fyrir íslenska landsliðið,“ segir Hareide í samtali við 433.is.

Hareide var hættur í þjálfun en boðið frá Íslandi heillaði hann.

„Símtalið fékk mig til að vilja snúa aftur. Ég sakna þessarar tegundar af fótbolta. Þú hefur nægan tíma til að plana leiki og þess háttar.“

Hareide segir að skipulag sé besta leiðin til að ná árangri með íslenska landsliðið.

„Ég er ekki að segja að liðið hafi verið óskipulagt en það þarf að vera skipulagt þannig að öllum líði vel með sitt hlutverk. Það þarf að vera skipulagður varnarlega en líka fram á við. Hvernig við ætlum að spila þegar við vinnum boltann og þess háttar.“

Fyrsti leikur Hareide með landsliðið verður gegn Slóvakíu 17. júní í undankeppni EM 2024. Þremur dögum síðar er leikur gegn Portúgal. Ísland er með þrjú stig í riðlinum eftir tap gegn Bosníu og sigur gegn Liechtenstein.

„Ef við vinnum (gegn Slóvakíu) setjum við okkur í góða stöðu. Jafntefli myndi þýða að við yrðum enn í fínni stöðu. Stigin á milli þessara þriggja liða (Íslands, Bosníu og Slóvakíu) mun líklega segja til um hver fer áfram og hver fer í umspilið.“

Viðtalið í heild er hér að neðan.