Þetta sagði Mai–Brit Storm Thygesen, lögmaður móður Emilie Meng, í samtali við TV2 í gær eftir að 32 ára karlmaður, sem er grunaður um að hafa numið Filippa á brott og að hafa nauðgað henni ítrekað, var úrskurðaður í gæsluvarðhald.
Thygesen benti á að fáar ungar stúlkur hverfi í Danmörku og því sé að sjálfsögðu næstum útilokað að telja ekki vera tengsl á milli máls helgarinnar og máls Emilie. Hún sagði að helstu rökin fyrir þessu séu að bæði málin hafi átt sér stað á sama svæðinu.
Emilie Meng hvarf í júlí 2016 í Korsør. Lík hennar fannst á aðfangadag sama ár í vatni við Borup. Morðingi hennar hefur ekki náðst.
Filippa hvarf á laugardaginn eftir að hún lauk blaðburði í Kirkerup sem er í um 25 km fjarlægð frá Korsør.
Lögreglan fann hana á lífi skömmu fyrir klukkan 15 á sunnudaginn í húsi í einbýlishúsahverfi í Svenstrup. 32 ára karlmaður var handtekinn á vettvangi og það var hann sem var úrskurðaður í gæsluvarðhald í gær.
Þegar gæsluvarðhaldskrafa lögreglunnar var tekin fyrir dóm kom fram að lögreglan telur manninn hafa svipt Filippa frelsi og að hafa nauðgað henni ítrekað.
Einnig kom fram að ekki sé hægt að útiloka að maðurinn hafi átt sér samverkamann sem gangi enn laus.
Susanne Bluhm, saksóknari, sagði eftir þinghaldið að það sé eðlilegt að lögreglan skoði önnur óupplýst mál í tengslum við rannsóknina á þessu máli.
