Í september árið 2022 fundust 339 kannabisplöntur í einbýlishúsi á höfuðborgarsvæðinu. Maður sem bjó einn í húsinu var ákærður í málinu. Dómur var kveðinn upp í þessu máli í Héraðsdómi Reykjavíkur þann 7. apríl síðastliðinn.
Í dómnum er að finna eftirfarandi frásögn af málsatvikum:
„Upphaf málsins var það að lögreglu barst tilkynning um að í fasteigninni að […] væri hugsanlega kannabisræktun. Um er að ræða einbýlishús með bílskúr. Ákærði var þar einn skráður til lögheimilis. Tveir lögreglumenn fóru á vettvang og tóku eftir því að kannabislykt var að finna við inngang á jarðhæð og að búið var að loka fyrir alla glugga á jarðhæðinni svo ekki sást inn. Skömmu síðar kom kona með tvö ung börn út um aðalinngang hússins á efri hæð. Hún sagðist ekki búa þarna en benti á ákærða. Bauð hún lögreglumönnum inn. Sáu þeir að íbúð var á efri hæð hússins og að dyr að stiga niður á neðri hæð hússins voru læstar með hengilás. Konan sagðist ekki vera með lykla að lásnum og ekki hafa komið þangað niður. Hún hringdi í ákærða og bað hann um að koma en yfirgaf vettvanginn síðan sjálf.“
Hinn ákærði kom síðan á vettvang, opnaði hengilásinn og leiddi lögreglumenn inn í vistarverurnar. Sást að kannabisræktun fór fram í húsnæðinu í fimm aðskildum rýmum. Var fjöldi kannabisplantna handlagður auk tóla og tækja til ræktunar.
Fyrir dómi sagðist ákærði hafa lært kannabisræktum af Youtube. Sagðist hann hafa átt ræktunina sem var á heimili hans og staðið einn að henni. Hann kvaðst hafa ræktað plönturnar til eigin nota en ekki til söludreifingar.
„Ákærða er gefið að sök fíkniefnalagabrot með því að hafa haft í vörslum sínum í sölu- og dreifingarskyni 339 kannabisplöntur og hafa um nokkurt skeið fram til þess dags
ræktað greindar plöntur. Ákærði hefur gengist við því að hafa ræktað plönturnar og haft þær í vörslum sínum en neitar því alfarið að það hafi verið í sölu- og dreifingarskyni. Hefur hann haldið því fram að þetta hafi einungis verið til eigin neyslu,“ segir í niðurstöðukafla dómsins.
Þrátt fyrir framburð mannsins telur dómurinn hafið yfir vafa að ræktunin hafi farið fram í sölu- og dreifingarskyni.
Maðurinn hefur ekki áður gerst sekur um refsiverða háttsemi. Var hann dæmdur í 12 mánaða skilorðsbundið fangelsi og til greiðslu sakarkostnaðar upp á um 1,3 milljónir króna.
Dóminn má lesa hér.
