Åge Hareide hefur verið ráðinn nýr þjálfari A-landsliðs karla. KSÍ staðfestir tíðindin, en þetta hefur legið í loftinu.

Hann tekur við af Arnari Þór Viðarssyni, sem var látinn fara á dögunum eftir fyrstu tvo leikina í undankeppni EM 2024. Um var að ræða tap gegn Bosníu og sigur gegn Liechtenstein.

Meira
Nærmynd af Age Hareide: Þetta er næsti landsliðsþjálfari Íslands – Ruddi brautina fyrir Haaland og hatar skrautlegar hárgreiðslur

Hareide er knattspyrnuáhugafólki að góðu kunnur og á að baki langan og árangursríkan feril sem þjálfari nokkurra af stærstu félagsliðum Norðurlanda, auk þess að hafa þjálfað landslið Noregs og Danmerkur um árabil við góðan orðstír. Hareide var við stjórnvölinn hjá norska landsliðinu árin 2003-2008 og stýrði landsliði Danmerkur árin 2016-2020.

Fyrstu leikir íslenska landsliðsins undir stjórn Hareide verða tveir heimaleikir í undankeppni EM 2024 í júní, gegn Slóvakíu og Portúgal.

„Åge Hareide er gríðarlega reynslumikill þjálfari sem veit hvað þarf til að ná árangri. Leitin og ráðningaferlið allt gekk tiltölulega hratt fyrir sig enda höfðum við ákveðnar hugmyndir um þann prófíl sem við vildum fá í starfið. Ég er mjög sátt við ráðninguna og bind miklar vonir við góðan árangur A landsliðs karla undir stjórn Åge,“ segir Vanda Sigurgeirsdóttir formaður KSÍ.