Ef þú stendur þig vel í vinnunni og nærð ákveðnum markmiðum færð þú kannski bónus. Núna er það þannig hjá rússneska hernum sem hefur reynt að sigrast á Úkraínumönnum í rúmlega eitt ár.

The New York Times segir að samkvæmt upplýsingum sem koma fram í leyniskjölum sem var nýlega lekið frá bandaríska varnarmálaráðuneytinu komi fram að rússneski herinn hafi nýlega tekið upp bónusgreiðslur fyrir ákveðinn árangur á vígvellinum.

Fá hermennirnir greiddan bónus ef þeim tekst að eyðileggja skriðdreka sem NATO-ríki hafa sent Úkraínumönnum að undanförnu.

Þessar bónusgreiðslur eru liður í tilraun til að bæta móralinn og bardagalöngun hermannanna. Ekki fylgir sögunni hversu hár bónusinn er.

Einnig á að deila myndböndum, sem sýna þegar skriðdrekar frá NATO eru eyðilagðir eða herteknir af rússneskum hermönnum, grimmt á samfélagsmiðlum í þeirri von að það muni veikja baráttuanda og móral Úkraínumanna og Vesturlandabúa.