Einn af æðstu yfirmönnum rússneska hersins og einn af þeim sem kom að stjórnun aðgerða hersins í Úkraínu var nýlega rekinn úr starfi. Ástæðan er hörmuleg frammistaða hans við stjórnun aðgerða hersins í Donetsk en þar varð herinn fyrir miklu manntjóni og missti mikið af búnaði.

Herforinginn fyrrverandi heitir Rustam Muradov og er hann sagður vera hrottafenginn yfirmaður sem hafi ekki hikað við að skipa hermönnum sínum að æða út í opinn dauðann.

Hann var hylltur sem „þjóðhetja“ sem gæti náð markmiðum Kremlverja um að ná öllu Donbas undir rússneska stjórn vegna reynslu sinnar í Tjétjeníu, Sýrlandi og sem næstæðsti yfirmaður heraflans í suðurhluta Rússlands. En þessi reynsla skilaði ekki tilætluðum árangri.

Breska varnarmálaráðuneytið segir í stöðuskýrslu sinni um gang stríðsins að Muradov hafi verið sparkað vegna lélegs árangurs á vígvellinum og „gríðarlegs tjóns“.

Hann er hæstsetti rússneski herforinginn sem hefur fengið sparkið það sem af er ári en líklega ekki sá síðasti, segja Bretarnir.

Orðrómar um brottrekstur Muradov hafa gengið á Telegram síðustu vikur og margir rússneskir fjölmiðlar hafa sagt frá honum en brottreksturinn hefur ekki verið staðfestur opinberlega.

Hersveitir Muradov hafa beðið mikið afhroð í hörðum bardögum um námubæinn Vuhleda. Bærinn er gjörónýtur en þar bjuggu um 15.000 manns fyrir stríð.

Einn af undirmönnum Muradov sagði að mannfallið við Vuhledar hafi verið svo mikið að aðeins 8 menn úr 100 manna hersveit hafi lifað af þátttöku í bardögunum þar.

Á þremur dögum í febrúar misstu hersveitir Muradov 103 hertól í sókn sinni að Vuhledar. Þar á meðal voru 36 skriðdrekar. Á sama tíma misstu Úkraínumenn 20 hertól, þar af tvo skriðdreka.