Vladímír Pútín, Rússlandsforseti, er að sögn svo hræddur um líf sitt að hann hefur látið koma upp fullkomnu loftvarnarkerfi við höll sína í fjöllunum norðan við Sochi í suðurhluta Rússlands.

Þetta segja samtök Aleksei Navalny, stjórnarandstæðings sem situr nú í rússneskum fangabúðum vegna andstöðu hans við Pútín.

Samtökin birtu nýlega myndband á YouTube-rásinni Navalny Live þar sem fullkomið Pantsir S1-loftvarnarkerfi sést í fjalllendi.

Samtökin segja að loftvarnarkerfinu hafi verið komið fyrir nærri afgirtum glæsihúsum sem eru annars vegar 3.800 fermetrar og hins vegar 8.300 fermetrar. Á lóðinni er þyrlupallur og upphituð utanhússlaug.

Eigandi fasteignanna er gasfyrirtækið Gazprom en Pútín er sagður nota húsin sem einkasumarleyfisstað sinn.