En er þessi orðræða hans leikrit eitt eða er hann að undirbúa endurkomu í æðstu valdastöður Rússlands?
„Ég bið um og vona að þið uppfyllið skyldur ykkar við föðurlandið. Ef þið hafi ekki uppfyllt skyldur ykkar við föðurlandið innan nokkurra daga þá byrja ég að taka á ykkur sem glæpamönnum sem hunsa heiður föðurlandsins og hagsmuni.“
Þetta las hann upp fyrir hermenn og fólk úr rússneska iðnaðinum nýlega. Þessi orð eru bein tilvitnun í skeyti sem Stalín sendi forsvarsmönnum rússneska hergagnaiðnaðarins haustið 1941 til að reyna að fá hjólin til að snúast hraðar.
Þegar hann hafði vitnað í Stalín sagði hann viðstöddum að hlusta á sig og muna orð Stalíns. „Eins og þið skiljið, þá voru niðurstöður þessarar hvatningar mjög áhrifamiklar,“ sagði hann síðan.
Frá því í desember hefur Medvedev verið yfirmaður iðnaðar- og hermálanefndar landsins en hlutverk hennar er að samhæfa afhendingu hergagna til hersveitanna í fremstu víglínu í Úkraínu.
Það ber auðvitað himinn og haf á milli stöðunnar í Rússlandi haustið 1941, þegar her nasista stóð á þröskuldinum að Moskvu, og þeim vandamálum sem Rússar glíma við núna í tengslum við innrásina í Úkraínu. En hjá áróðursmaskínu Kremlverja eru skilin á milli staðreynda og goðsagna löngu horfin og Medvedev hefur tekið sér stöðu í fararbroddi hinna blóðþyrstu.
Medveden gegndi embætti forseta frá 2008 til 2012 en þá varð Pútín að taka sér frí frá því að vera forseti þar sem stjórnarskráin heimilaði honum ekki að sitja svo lengi samfellt í embætti. Hann skipti einfaldlega við Medvedev um embætti og varð forsætisráðherra á meðan Medvedev var forseti. Fáum duldist þó hver fór með völdin í landinu.
Í forsetatíð Medvedev bundu margir vonir við hann sem frjálslyndan stjórnmálamann og því urðu margir fyrir vonbrigðum þegar hann lét af forsetaembætti 2012 án þess að takast á við Pútín um það. Að launum fékk hann embætti forsætisráðherra allt fram til 2020 en þá var hann gerður að varaformanni öryggisráðs landsins. Margir telja þetta hafa verið töluverða stöðulækkun fyrir hann.
Sérfræðingar hafa bent á að Medvedev sé einn fárra sem njóti algjörs trausts Pútíns og að staða hans sem formanns iðnaðar- og hermálanefndar landsins bendi til að hann geti komist til æðstu metorða á nýjan leik.
Abbas Galljamov, fyrrum ræðuritari Pútíns, sagði í samtali við Radio Free Europe að miðað við það sem hefur gerst í rússneskum stjórnmálum síðustu mánuði, þá geti Medvedev orðið eftirmaður Pútíns
Hann sagði að hugsanlega verði Medvedev gerður að forsætisráðherra eftir ósigra á vígvellinum í Úkraínu. Pútín muni þá gera breytingar á ríkisstjórninni og gera Medvedev að forsætisráðherra á nýjan leik. Veita honum völd til að stjórna hernum og segi við hann: „Gjörðu svo vel, byrjaður, sigraðu í stríðinu. Nú berð þú ábyrgð á þessu.“
