The New York Times skýrir frá þessu og byggir þetta á upplýsingum frá ónafngreindum bandarískum heimildarmönnum og leyniskjölum sem var lekið á netið nýlega.
Í upphafi stríðsins gerðu rússneskar orustuþotur harðar árásir á skotmörk í Úkraínu og fóru þær mörg hundruð árásarferðir. En skjót viðbrögð Úkraínumanna og takmörkuð færni rússnesku flugmannanna kom í veg fyrir að úkraínski herinn væri nánast gerður að engu.
The New York Times segir að nú séu uppi áhyggjur af að árásir Rússa með langdrægum flugskeytum séu að ganga nærri birgðum Úkraínumanna af flugskeytum sem þeir nota við loftvarnir.
Samkvæmt upplýsingum úr fyrrgreindum leyniskjölum, sem var lekið frá bandaríska varnarmálaráðuneytinu, þá stefnir í að Úkraínumenn verði búnir með flugskeytin fyrir S-300 og Buk flugskeytavarnarkerfin sín í byrjun maí og hugsanlega nú um miðjan apríl ef svartsýnustu spár ganga eftir.
Leyniskjölin eru dagsett 28. febrúar og byggjast upplýsingarnar í þeim á notkun Úkraínumanna á flugskeytum á þeim tíma.
Í skjölunum kemur fram að sá hluti úkraínskra loftvarna, sem ber ábyrgð á að verja hermenn í fremstu víglínu, geti verið kominn í algjört þrot 23. maí. Heimildarmenn The New York Times segja að ef þetta gangi eftir geti Rússar aftur talið öruggt að senda orustuþotur og sprengjuflugvélar lengra inn í Úkraínu.
Bandaríska ríkisstjórnin tilkynnti nýlega að hún muni senda fleiri loftvarnarkerfi og skotfæri til Úkraínu og er þetta hluti af vopnapakka upp á 2,6 milljarða dollara sem Úkraínumenn fá.
