Besta deild karla hefst á morgun með heilli umferð og er eftirvæntingin mikil.

Leitað var til stuðningsmanna liðanna í deildinni og lagður fyrir þá spurningalisti.

Það er komið að Fram. Þar var auðvitað leitað til Stefáns Pálssonar, sagnfræðings með meiru.

Hvernig líst þér á sumarið hjá þínu liði?
Ég er bara bjartsýnn á sumarið hjá okkur Frömurum, en af því að ég er maður hinna hófstilltu væntinga þá ætla ég ekki að gera kröfu um meira en bikarmeistaratitil í ár.

Hvernig finnst þér hafa gengið að styrkja leikmannahópinn
Leikmannastyrkingarnar fyrir síðasta tímabil létu ekki mikið yfir sér en reyndust svo hárréttar. Ég ætla því að treysta fullkomlega á dómgreind þjálfarans og stjórnarinnar. Þar fyrir utan er hellingur af efnilegum guttum að koma upp svo það má segja að aðalstyrkingin komi innan úr félaginu.

Hver er uppáhalds leikmaðurinn þinn í liðinu?
Má gera upp á milli? Maður er alltaf ánægðastur með þá heimaöldu og Már Ægisson hefur verið í uppáhaldi lengi.

Ertu dugleg/ur að mæta á völlinn hjá þínu liði?
Ef ég er í bænum eða á landinu þá mæti ég á Framleiki. Reyni að komast til Akureyrar og Eyja, en það gengur samt ekki alltaf.

Fyrir utan heimavöllinn hjá þínu félagi, hvar er skemmtilegast að fara á völlinn?
Víkingur Ólafsvík er með frábært vallarstæði. Eyjamenn eru höfðingjar heim að sækja og svo er ekki hægt annað en að öfunda Valsarana af Fjósinu sínu, þótt það hryggi mig að þurfa að viðurkenna það.

Hvað finnst þér um fyrirkomulagið í Bestu deildinni sem var prófað í fyrsta sinn á síðustu leiktíð?
Það kann vel að vera að fólk hafi verið að kalla eftir 27 leikja Íslandsmóti í stað 22 leikja, en það langaði engan í fimm umferðir í október leiknar með viku á milli leikja. Við græðum ekkert á því að teygja mótið of langt inn á haustið en það má eflaust venjast þessu eins og öðru. Mót verða spennandi ef liðin eru jöfn ekki með því að fikta í keppnisfyrirkomulaginu.

Hvaða lið verður Íslandsmeistari?
Valur.