Halldór Ragnarsson myndlistarmaður opnar sýninguna Sófamálverkin næsta föstudag í Vest í Ármúla og verður opin til 30. apríl næstkomandi.

„Sófamálverk“  er hugtak sem hefur oft verið kastað á milli listamanna í gegnum árin. Hugtakið er í raun neikvætt fyrirbrigði og í orðinu felst að málverk séu jafnvel „sellout-leg” og gerð til þess að passa sérstaklega við liti og anda einhvers ákveðins rými, sófa eða heimilis.

Á sýningunni Sófamálverkin rýnir myndlistarmaðurinn Halldór Ragnarsson á sinn kaldhæðnislega hátt í hugtakið og þá sérstaklega á mótsögnina sem felst í hugtakinu. Og hvar er betra að skoða það hugtak í sambandi við verk sín en einmitt í fínni húsgagnaverslun sem selur enn fínni sófa?

Halldór Ragnarsson (f. 1981) lauk B.A. gráðu (2007) og M.A. gráðu (2014) frá myndlistardeild Listaháskóla Íslands eftir að hafa numið heimspeki áður við Háskóla Íslands. Halldór á 13 einkasýningar að baki ásamt því að hafa tekið þátt í fjölda samsýninga; bæði hér og erlendis.

Opnun föstudaginn 31.mars klukkan 17:30 – 19:30.