Helgi Fannar Sigurðsson skrifar frá Liechtenstein

Andri Lucas Guðjohnsen var að vonum sáttur með 7-0 sigur Íslands á Liechtenstein í dag.

Liðin mættust í öðrum leiknum í undankeppni EM 2024 og kom íslenska liðið með gott svar eftir stórt tap gegn Bosníu-Hersegóvínu á fimmtudag.

„Það var erfitt eftir úrslitin í Bosníu að rífa sig í gang aftur. En við gerðum það í dag, náðum að skora mörg mörk. Ég held að við höfum sýnt hvað við erum góðir í fótbolta þegar við spilum saman,“ segir Andri, sem skoraði eftir að hafa komið inn á sem varamaður í dag.

„Svona leikur er mikilvægur. Að fá þrjú stig, skora mörk og fagna með liðsfélögunum.“

Landsliðsfyrirliðinn Aron Einar Gunnarsson skoraði þrennu í dag og var stórkostlegur. Hann skoraði þriðja mark sitt úr víti sem Andri hafði gert sig líklegan til að taka.

„Um leið og ég heyrði rödd Arons þá vissi ég að ég gæti ekki gert neitt í því. Auðvitað tekur hann vítið og klárar þrennuna,“ sagði Andri léttur.