Ath. Fréttin hefur verið uppfærð og nýrri tíðindi eru neðar: 

Miklar drunur kváðu við í Ásahverfinu í Garðabæ síðdegis í dag en þar logar nú eldur í íbúðarhúsi við Eskiás. Ekki hefur verið flutt inn í húsið.

„Það titraði allt og skalf í hverfinu,“ segir íbúi sem sendi mynd sem er neðst í fréttinni. Segir íbúinn, kona, að eitthvað sem líktist kút hafi flogið langar leiðir út úr húsinu, nokkra metra upp í loft, svo vegfarendur forðuðu sér á hlaupum. Lenti kúturinn í næstu götu. Segir viðkomandi að fólk hafi fallið í götuna í nálægð við sprenginguna

„Gaskúturinn fór að minnsta kosti 10 metra upp í loft, mun hærra en kranarnir, og endaði fyrir fram húsið okkar,“ segir konan ennfremur.

Konan segir ennfremur að hlutir hafi fallið af veggjum hennar er sprengingin varð. Býr hún í næstu götu við Eskiás þar sem eldurinn logar nú.

Hér gefur að líta myndband af sprengingunni: 

Sprenging í Garðabæ

Samkvæmt frétt RÚV hefur allt tiltækt slökkvilið á höfuðborgarsvæðinu verið kallað út að húsinu. Eldurinn kom upp á fimmta tímanum. „Þykkan svartan reyk leggur frá húsinu, en hann sést vel úr fjarlægð og hefur risið sífellt hærra á síðustu mínútum,“ segir þar.

Meðfylgjandi mynd tók Selma Kristín Erlendsdóttir:

Samkvæmt frétt RÚV bendir allt til þess að sprengingar hafi orðið en þær urðu áður en fréttamaður kom á vettvang.

Samkvæmt heimildarmanni DV stórsér á fjölbýlishúsi við hliðina þar sem eldsvoðinn er. Íbúðir í húsinu þar sem sprengingin varð hafa verið auglýstar til sölu og áttu þær að vera til sýnis næsta sunnudag. Íbúðirnar eru núna væntanlega gjörónýtar.

Fréttablaðið ræddi við Borgar Valgeirsson, slökkviliðsmann hjá Slökkviliðinu á höfuðborgarsvæðinu, sem sagðist telja að gaskútar á framkvæmdasvæðinu hefðu sprungið vegna eldsins. Ef svo eru þá eru sprengingarnar ekki orsök eldsins heldur afleiðingar hans.

Slökkviliðið segir staðfest að enginn hafi slasast í sprengingunni eða í eldinum.

Uppfært kl. 18:12: 

Búið er að slökkva eldinn. Samkvæmt RÚV voru nokkrir iðnaðarmenn að störfum í byggingunni er eldurinn braust út en þeim tókst að forða sér áður en sprengingarnar urðu en þær urðu vegna þess að eldurinn komst í gaskúta á þaki hússins.