Það hefur alveg verið betra stuð í Íþróttaviku stúdíóinu en Tómas Þór Þórðarson, ritstjóri enska boltans hér á fróni, kom og fékk sér sæti ásamt Herði Snævari Jónssyni, íþróttafréttastjóra Torgs. Ástæðan fyrir stuðleysinu var tap Íslands gegn Bosníu en framundan er leikur gegn Liechtenstein á sunnudag.

Benedikt Bóas, þáttarstjórnandi spurði þá Tómas og Hörð um þessar ofboðslegu óvinsældir Arnars Þórs á samfélagsmiðlum. Það komi varla jákvæð ummæli í hans garð. „Mér fannst Kári og Rúrik segja það ágætlega að KSÍ ákvað að fara inn í þessa undankeppni með Arnar í brúnni og þá er galið að henda honum burt núna. En hann á Liechtenstein leikinn og Slóvakíu leikinn sem eru hans reipi til að bjarga sér því við gerum okkur engar vonir um neitt gegn Portúgal. Þessir tveir leikir þurfa að vera sex stig og punktur og basta. Annars þarf Vanda og stjórnin að skoða hans mál.“

Tómas var sammála að það hefði verið galið að henda Arnari fyrir þessa undankeppni. „En fyrsti hornsteinninn í nýja húsinu er gjörsamlega mölbrotinn. Við fáum nú Liechtenstein leikinn og það er eins gott að það verði sómasamleg frammistaða. En til að svara spurningunni þá er þetta rétt. Ég hef ekki upplifað svona óvinsælan landsliðsþjálfara – bara aldrei.“

Rifjað var upp að Ólafur Jóhannesson hafi nú ekki verið sérlega vinsæll og Eyjólfur Sverrisson fékk fyrirsögn í Fréttablaðinu eftir jafntefli gegn Liechtenstein árið 2007: Segðu af þér Eyjólfur.

„Eyjólfur fékk fyrirsögnina Segðu af þér Eyjólfur beint í smettið á sínum tíma. Það var mikið en það var meira fjölmiðla umhverfið. Núna eru allir og engir með rödd út af samfélagmiðlum.“