Helgi Fannar Sigurðsson skrifar frá Zenica í Bosníu

Hákon Arnar Haraldsson, miðjumaður íslenska landsliðsins segir leikmenn þess ekki hafa mætt til leiks í kvöld í 3-0 tapi gegn Bosníu í undankeppni EM 2024. Nú þurfi að læra af því sem liðið gerði illa í leiknum og vinna næsta leik

„Þetta var ekki nógu gott í dag,“ sagði Hákon Arnar við íslensku fjölmiðlasveitina eftir leik í kvöld. „Við mættum eiginlega bara ekki til leiks, ég veit ekki af hverju þetta fór þannig en við vorum eftir á í öllum aðgerðum, þeir næstum því hlupu bara yfir okkur.“

En hvað var það sem vantaði upp á?

„Það vantaði bara helling upp á hjá okkur hvað varðar baráttu um seinni bolta og einvígi, þeir unnu næstum því allt og við ekki nógu aggressívir.

Er svekkelsið mikið eftir svona leik?

„Þetta er auðvitað högg, að tapa 3-0 í fyrsta leik en mér fannst þetta ekki vera 3-0 leikur. Það þýðir ekkert að vera svekkja sig á þessu of mikið núna, við klárum þetta í kvöld og svo tekur bara næsti leikur við.“

Hvað þarf íslenska liðið að gera núna?

„Við þurfum bara að sjá hvað við gerðum vel, sjá hvað við gerðum illa og bæta það sem við gerðum illa. Nú tekur bara næsti leikur við.“