Íslenska karlalandsliðið í knattspyrnu hóf vegferð sína í undankeppni EM 2024 á afar slæmu tapi gegn Bosníu & Herzegovinu á útivelli. Lokatölur 3-0 í Zenica í kvöld.
Heimamenn í Bosníu & Herzegovinu komust yfir stax á 14. mínútu leiksins þegar að boltinn barst til Rade Krunic inn í vítateig Íslands og hann gat ekki annað en komið boltanum í netið. Varnarleikur Íslands ekki til útflutnings.
Krunic var síðan aftur á ferðinni á 40. mínútu er hann tvöfaldaði forystu heimamanna. Staðan 2-0 þegar flautað var til hálfleiks.
Ekki skánaði staðan í síðari hálfleik því að á 63. mínútu kom Arnar Dedic sér í góða stöðu við vítateig Íslendinga og lét vaða í átt að marki, boltinn endaði í netinu og staðan því orðin 3-0.
Fleiri mörk voru ekki skoruð í leiknum og byrjar íslenska landsliðið því undankeppni EM á tapi. Næsti leikur Íslands er á sunnudaginn kemur þegar að liðið heimsækir Liechtenstein.
Hér má sjá einkunnir íslensku landsliðsmannanna í leiknum:
Rúnar Alex – 5
Átti tvær mjög fínar vörslur í fyrri hálfleik og var skársti maður Íslands. Hægt að setja spurningamerki við hann í þriðja markinu.
Guðlaugur Victor – 3
Átti dapran leik eins og aðrir í vörninni.
Daníel Leó – 3
Miðverðir Íslands voru afar ótraustir í dag.
Hörður Björgvin – 3
Miðverðir Íslands voru afar ótraustir í dag.
Davíð Kristján – 2
Á stóra ábyrgð í tveimur mörkum Bosníu og Dedic fór hrikalega illa með hann.
Arnór Ingvi – 4
Veitti varnarlínunni litla vernd. Líklega of stórt verkefni að vera einn djúpur á miðjunni í þessum leik.
Hákon Arnar – 3
Náði ekki að búa til neitt fyrir fremstu menn.
Jóhann Berg – 4
Átti skárri leik en margir aðrir en þó ekki góður frekar en neinn annar.
Arnór Sigurðsson – 3
Sást ekkert til hans.
Jón Dagur – 4
Sýndi fína spretti á fyrstu mínútum leiksins en ekki mikið meira en það.
Alfreð Finnbogason – 4
Fékk nákvæmlega enga þjónustu og gat lítið gert.
