Þrjú landslið Íslands í knattspyrnu munu leika með sorgarbönd í landsleikjum sínum í vikunni og heiðra minningu Þuríðar Örnu Óskarsdóttur. Þetta kemur fram í tilkynningu frá KSÍ.
Undir 17 ára- og undir 19 ára landslið karla hefja leik í milliriðlum undankeppni EM 2023 á miðvikudag, og á fimmtudag leikur A landslið karla sinn fyrsta leik í undankeppni EM 2024, gegn Bosníu-Hersegóvínu.
Í þessum þremur leikjum munu íslensku liðin leika með sorgarbönd til að heiðra minningu Þuríðar Örnu Óskarsdóttur, sem féll frá nýlega eftir löng og erfið veikindi. Þuríður var dóttir Óskars Guðbrandssonar og Áslaugar Hinriksdóttur, en Óskar Örn er starfsmaður KSÍ.
Knattspyrnusambandið vottar fjölskyldunni innilega samúð sína.
„Blessuð sé minning Þuríðar Örnu,“ segir í tilkynningu KSÍ.
U17 karla mætir Svartfjallalandi á miðvikudag og U19 karla leikur við Tyrkland. Ákveðið hafði verið fyrir nokkru síðan að leika með sorgarbönd í leik U19 karla í virðingarskyni við allt það fólk sem lést eða á um sárt að binda vegna jarðskjálftanna sem skullu á Tyrklandi og Sýrlandi fyrr á árinu, og er ástæðan fyrir sorgarböndum í þeim leik því tvíþætt.
