Íslenski landsliðsmaðurinn Hákon Arnar Haraldsson hefur framlengt samning sinn við FC Kaupmannahöfn til sumarsins 2027. Þetta kemur fram í tilkynningu frá félaginu.

Hákon Arnar er einn af mest spennandi leikmönnum dönsku úrvalsdeildarinnar um þessar mundir. Þessi 19 ára gamli miðjumaður hefur farið með himinskautum hjá FC Kaupmannahöfn og unnið sig upp úr yngri liðum félagsins í aðallið þess og er þar orðinn einn uppáhalds leikmaður stuðningsmanna FCK.

„Hákon er einn mest spennandi leikmaður sem við höfum séð í Danmörku í mörg ár,“ sagði Peter Christiansen, yfirmaður íþróttamála hjá FCK eftir að Hákon hafði framlengt samning sinn. „Hér gríp ég til stórra orða en við höfum fulla trú á því að hér sé um afar sérstakan og efnilegan leikmann að ræða.“

Leikmann sem hafi ekki bara sýnt hvað í sér býr í dönsku úrvalsdeildinni, heldur einnig í Meistaradeild Evrópu sem og með íslenska landsliðinu.

Hákon hefur verið á mála hjá FCK frá árinu 2019 en þá gekk hann til liðs við félagið frá ÍA aðeins 16 ára gamall. Hann er ánægður með að hafa framlengt samning sinn í Kaupmannahöfn.

„Mér líður frábærlega hjá FCK og í Kaupmannahöfn,“ sagði Hákon eftir að hafa skrifað undir framlenginguna. „Mér finnst ég alltaf vera að þróa leik minn meira og meira og er hér ásamt frábærum liðsfélögum og þjálfurum. Það er þess vegna sem ég sé FCK sem kjörinn stað til þess að þróa leik minn enn meira.“

F.C. København har forlænget aftalen med et af 3F Superligaens største talenter, Hákon Arnar Haraldsson, til sommeren 2027 #fcklive https://t.co/lD5pWhLTrN

— F.C. København (@FCKobenhavn) March 20, 2023