Kristján Óli Sigurðsson, sérfræðingur Þungavigtarinnar segir að Fram og Gunnar Gunnarsson séu að rifta samningi hans við félagið.

Kristján segir að agaleysi í þjálfarateymi Fram hafi sett af stað kurr á milli leikmanna og þjálfarateymis og var Gunnar einn þeirra.

„Þeir voru að rifta samningi við Gunnar Gunnarsson, miðvörð sem myndaði frábært par með Kyle McLagan 2021 þegar þeir fóru upp. Það er verið að gera starfslokasamning,“ segir Kristján Óli í Þungavigtinni

„Það er búið að vera langur aðdragandi og leiðindi, Fram var með eineltistilburði. Hann átti að æfa einn sex sinnum í viku, þetta er búið að vera lengi í ferli,“ segir Kristján.

Hann segir að upphafið hafi verið kurr vegna þess að nokkrir leikmenn hafi sett út á hegðun þjálfarateymis í æfingaferð síðasta vor.

„Upphafið var kurr í æfingaferð í fyrra vegna agaleysis á þjálfurum. Þjálfarateymið var með agaleysi utan vallar og á æfingum, menn voru ekki að taka þetta alvarlega. Menn voru meðal annars að fá sér en vinnan þarf að ganga fyrir, það var fundað með þjálfarateyminu eftir þetta,“ segir Kristján

„Menn vildu gera þetta faglega, þegar skotglös fara að poppa úr sjúkratöskunni. Þá setja menn fótinn niður, stór hluti af þessum mönnum sem héldu þennan fund eru farnir úr félaginu í dag. Það er búið að bola þeim burt, það er búið að taka til.“