Eins og flestir vita nú var Albert Guðmundsson ekki valinn í landsliðshóp Arnars Þórs Viðarssonar fyrir komandi landsleiki gegn Bosníu og Liechtenstein í dag.

Arnar segir að Albert hafi ekki verið til í að koma í landsliðið á forsendum liðsins, en ósætti hefur verið þeirra á milli og þjálfarinn ekki valið hann síðan í haust.

Þetta var til umræðu í Meistaradeildarumfjöllun Viaplay í kvöld, þar sem Kári Árnason og Rúrik Gíslason, fyrrum landsliðsmenn, voru spurðir út í þessi mál.

„Maður veit ekki hvar hausinn á honum er. Það hefur eitthvað gerst þarna sem maður áttar sig ekki á. Það hefur verið fjaðrafok í kringum drenginn sem ég skil ekki alveg. Hann hefur ekkert verið að draga vagninn með landsliðinu. Hann er frábær leikmaður með mikla hæfileika en hvort hann henti þessu liði, þar sem allir þurfa að vera að þjösnast, þetta er svolítill lúxusleikmaður,“ segir Kári.

Hann bendir þó á að Albert gæti án efa nýst liðinu. „Hann getur gert hluti upp á sitt einsdæmi sem ekki margir í liðinu geta.“

Rúrik tók til máls. „Við erum að mörgu leyti ósammála. Ég hefði alltaf valið hann. Þetta eru fullorðnir karlmenn. Við eigum bara að slíðra sverðin og velja hann. Að því sögðu verður íslenska landsliðið að vera ein liðsheild.

Ég fýla Albert og hefði valið hann. Leyfum Alberti aðeins að vera Albert.“