Guðjón Guðmundsson mætti í settið í Íþróttavikunni sem sýnd er á Hringbraut öll föstudagskvöld. Gaupi, eins og hann er ávalt kallaður, fór þar yfir sviðið og rifjaði upp þegar hann var söngvari í hinum ýmsu böndum og ætlaði að vera poppstjarna.

„Frá 16 ára til 21 árs var ég í þessum bransa og náði að leika fyrir dansi á öllum heldur öldurhúsum borgarinnar eins og Glaumbæ, Silfurtúni, Tjarnabíó og fleiri. Náði svolítið að taka hringinn og fara á sveitaböll víða um land. Upplifa smá rútubílafyllerí,“ sagði hann og hló.

Á vefsíðunni Glatkistunni segir frá Hljómsveitinni Tívolí þar sem Ellen Kristjánsdóttir var meðal annars söngkona. Um sumarið 1977 voru uppi hugmyndir um að bæta við öðrum söngvara og var Gaupi nefndur í því samhengi, hann kom einu sinni fram með sveitinni en ekki varð meira úr því samstarfi.

„Ég tók eitt gigg með þeim. Ég var að velta því fyrir mér en ég var eiginlega kominn í annað. Það sem truflaði mig á þessum tíma var að Rabbi heitinn og Rúnar Þórisson gítarleikari voru með hljómsveit á Ísafirði og þeir voru búnir að liggja í mér að koma vestur og taka með þeim sumargigg. Ég var lengi vel að spá í það. Stökkva um borð sem ég gerði ekki og þeir stofna í kjölfarið Grafík.

Það var kannski gott því þá hefðu þeir ekki fundið Helga Björns og hann væri enn að vinna á höfninni.“