Náfrænka Baltasars Kormáks – „Það er hægt að komast í gegnum erfiðleikana“
Ýr Guðjohnsen, 15 ára stúlka, sló rækilega í gegn í Ísland Got Talent í gærkvöldi og vakti tilfinningaþrunginn flutningur hennar athygli. Ýr, sem hefur upplifað ýmislegt þrátt fyrir ungan aldur, hreif dómnefndina upp úr skónum með flutningi sínum.
Ýr söng lag sem er henni hugleikið og fjallar um erfiðleika sem hún þekkir af eigin reynslu. „Ef maður hlustar á textann þá finnur maður fyrir tilfinnungunum og veit hvað er í gangi. Mig langar að koma sögu minni á framfæri, að það sé hægt að komast í gegnum erfiðleika. Að lífið sé ekki bara búið,“ sagði Ýr í þættinum í gærkvöldi. Myndband má sjá neðst í fréttinni.
Eftir flutninginn sagði Ágústa Eva að Ýr væri hæfileikarík söngkona en lagið ef til vill ekki hentað hennar rödd. Hún spurði hana hvort hún kynni eitthvað annað lag og sagðist Ýr vera með aukalag. Fumlaus flutningur vakti mikla hrifningu dómaranna sem hrósuðu henni mikið. „Ég gef þér 100% já,“ sagði Ágústa Eva og Marta María sagði að hún fengi að sjálfsögðu já.
Í viðtali við Pjatt.is í fyrrasumar kom fram að Ýr ætti ekki langt að sækja hæfileikana. Hún er náfrænka eins Baltasars Kormáks og í viðtalinu kom fram að hún hefði nokkrum sinnum fengið tækifæri á að leika í kvikmyndum. Því miður hefðu þau tækifæri komið þegar hún lá veik inni á sjúkrahúsi vegna átröskunar, en átröskunina mátti rekja til ofbeldis sem hún varð fyrir í æsku.
Í viðtalinu við Pjatt, sagði hún meðal annars:
„Mundu að þú getur ekki orðið fallegri en þegar þú leyfir sjálfstraustinu að skína! Að líða vel með sjálfa þig, og hvernig þú lítur út, toppar allan farða sem þú getur skellt á andlitið. Þegar þú þykist vera einhver önnur en þú ert þá lýgur þú fyrst og fremst að sjálfri þér. Settu trú þína og vilja í sjálfa þig og ekkert mun hamla þér!“
Ýr virðist á réttri hillu í söngnum og ljóst að framtíð þessarar fimmtán ára stúlku er björt.
