Jur­gen Klopp, knatt­spyrnu­stjóri Liver­pool og Erik ten Hag, knatt­spyrnu­stjóri Manchester United hafa tekið höndum saman fyrir stór­leik liðanna á morgun og biðla til stuðnings­manna liðanna um að syngja ekki níð­söngva um hræði­lega at­burði sem hafa átt sér stað í sögu beggja fé­laga.

Það er Sky Sports sem greinir frá en í sögu beggja fé­laga má finna mann­skæða at­burði á borð við Hillsbor­ough og Munich slysin.

,,Ein aðal á­stæðan fyrir því af hverju rígurinn á milli Liver­pool og Manchester United er svona sér­stakur er ást­ríðan og það ætti aldrei að breytast.

Hins vegar, þegar of mikið kapp færist í leikinn, getur það borið okkur ofur­liði og komið okkur fyrir á stað sem er ekki góður fyrir neinn, við þurfum þetta ekki,“ sagði Klopp í yfir­lýsingu.

Yfir­lýsing Erik ten Hag tekur í sama streng, kappið megi ekki bera menn ofur­liði.

,,Rígurinn á milli Manchester United og Liver­pool er einn sá mikil­feng­legasti í knatt­spyrnu­heiminum. Við elskum ást­ríðu stuðnings­mannanna þegar að liðin mætast en til eru tak­mörk, línur sem ekki ætti að stíga fæti yfir.“

Hillsbor­ough at­burðurinn árið 1989 tók líf 97 stuðnings­manna Liver­pool á heima­velli Sheffi­eld Wed­nes­day í undan­úr­slitum enska bikarsins þar sem Liver­pool mætti Notting­ham For­rest.

Í svipuðu slysi fjórum árum áður, sem kennt er við Hey­sel létust 39 stuðnings­menn í úr­slita­leik í Evrópu­keppni milli Liver­pool og Juventus.

Munich slysið varð síðan þegar að flug­vél, sem inni­hélt meðal annars leik­menn og þjálfara­t­eymi Manchester United, brot­lenti við flug­tak frá Munich-Reim flug­vellinum með þeim af­leiðingum að 23 létu lífið.