Kaja Organic fagnar 10 ára afmæli í mars og í tilefni þess eru söluhæstu vörurnar settar í nýja íslenskan búning með nýju útliti. Karen Jónsdóttir, alla jafna kölluð Kaja, er konan bak við Kaja Organic og Matarbúr Kaju.
Kaja býður upp á lífrænt vottaðar matvörur eftir vigt, í smásölupakkningum og rekur einnig kaffihúsið Café Kaja. Þar er hægt að fá lífrænt kaffi, te og hollar, lífrænar kræsingar, eins og samlokur, bakkelsi og sæta bita úr besta hráefni sem völ er á. Kaja trúir því staðfastlega að við séum það sem við borðum og með þann boðskap stofnaði hún Kaja Organic, Matarbúr Kaju og Café Kaju sem hefur blómstrað á Skaganum og fagnar nú 10 ára afmæli.
Minnka kolefnisspor og auka sjálfbærni
Regla Kaju er einföld: Allar vörur eru lífrænar, umhverfisvænar og gæðin í hámarki. Nú eru það vörurnar sem fá að njóta afmælisins. „Í tilefni af 10 ára starfsafmæli Kaju Organic setjum við söluhæstu vörurnar okkar í íslenskan búning og með nýju útliti . Með þessum breytingum náum við miklum árangri í umhverfisvernd auk þess sem viðskiptavinir okkar fá að njóta hagræðingar,“ segir Kaja.
„Við fengum Prentmet Odda til að hanna með okkur nýjar umbúðir auk þess sem Prentmet Oddi notaði nýjan vélbúnað til að framleiða öskjur með gluggum. Við förum úr pokum sem voru úr niðurbrjótanlegum efnum og framleiddir á erlendri grundu í einfalda pappa öskju með plast glugga. Með þessum breytingum náum við að minnka kolefnisspor okkar, aukna sjálfbærni, nota umbúðir sem unnar eru úr hreinni og endurnýtanlegri orku, nota pappír úr nytjaskógum og styðja við íslenskt atvinnulíf,“ segir Kaja og er stolt af því að geta stigið þetta skref. „Þessar breytingar gera okkur einnig kleift að lækka verð á tveimur vörutegundum og koma í veg fyrir aðrar verðhækkanir sem einnig er mikilvægt á þessum skrítnu tímum. Við fengum góða Skagakonu til liðs við okkur en jóga kennarinn Guðrún Dögg Rúnarsdóttir mun vera andlit okkar á kex auglýsingunum.“
Karen Jónsdóttir, ávallt kölluð Kaja, er konan bak við Kaja Organic og Matarbúr Kaju. Hún fagnar 10 ára starfsafmæli í mars með nýjum umbúðum fyrir vinsælustu vörur sínar. DV/ANTON BRINK.
Tekist á við áskoranir þessi 10 ár
Kaja segir að þessi 10 ár hafi svo sannarlega verið áskorun í rekstrinum. „Þegar maður sest niður og horfir til baka þessi 10 ár sem ég er búin að vera í rekstri þá er fyrsta hugsun sú: „Það er eins gott að maður getur ekki séð framtíðina. Ég hefði sennilega aldrei farið út í þennan rekstur ef ég hefði vitað að við ættum eftir að ganga í gegnum eins Covid og nú Úkraníustríðið, þrátt fyrir allar skemmtilegu stundirnar.“
