Eyjólfur Kristjánsson kom í Íþróttavikuna með Benna Bó sem sýnd er á Hringbraut á föstudagskvöldum. Með honum var Hörður Snævar Jónsson, íþróttafréttastjóri Torgs. Þeir félagar fóru yfir fréttir vikunnar en meðal þess sem bar á góma var hið óvænta hrós sem Jóhann Berg Guðmundsson fékk frá gamla brýninu Neil Warnock.

„Það var frábært að heyra þetta frá honum. Ég held að það sem Warncock sé að segja þarna sé hverju orði sannara. Ég hef ekki séð Jóa spila betur. Hann er svo ofboðslega stöðugur. Hann gerir svo fá mistök og ég horfi á alla Burnley leiki. Burnley er mitt lið á eftir Manchester United. Hann finnur alltaf mann og á mjög sjaldan sendingar sem fara annað en á samherja.“

Jóhann var var gestur í hlaðvarpsþættinum, Chess After Dark um helgina. Drengirnir heimsóttu Jóhann til Manchester og fóru yfir sviðið.

Jóhann hefur verið atvinnumaður frá árinu 2008 en framlengdi á dögunum samning sinn við félagið sem er á leið aftur í ensku úrvalsdeildina og hefur þá verið hjá félaginu í átta ár. Hann sagði að stærsti samningur hans á ferlinum hafi verið hjá Burnley í ensku úrvalsdeildinni og viðurkenndi að það hafi gefið vel í aðra hönd.

Eyfi þekkir vel til Jóa en fyrsti atvinnumannasamningurinn var undirritaður heima hjá Eyfa. „Við erum svolítið tengdir ég og Jói. Hann gekk frá sínum fyrsta samning við AZ Alkmaar heima hjá mér í sófanum. Ég er vel kunnugur föður hans og ég þekkti líka umboðsmanninn hans og kom þeim saman. Það var úr að hann samdi við AZ Alkmaar og ég fór og heimsótti hann þangað. Skellti mér á leik með AZ og Ajax þar sem AZ vann þar sem Jói var reyndar meiddur en Kolli skoraði sigurmarkið með skalla.“

Eyfi ætlar að fara á lokaleikinn hjá Burnely þar sem titillinn í Championship deildinni fer á loft en Burnley er að vinna þá deild með miklum yfirburðum. „Áttunda maí. Þá fer ég.“