Mörgæsir eru almennt séð lítil og friðsöm dýr sem lifa í sínum hópi og hafa einna helst áhyggjur af að verða sér úti um æti og að geta alið önn fyrir afkvæmum sínum. En það hafa ekki allar mörgæsir verið litlar og sætar þegar horft er til baka á sögu jarðarinnar.

Fyrir 50 milljónum ára gekk risamörgæsin Kumimanu fordycei um á jörðinni. Dýr af þessari tegund vógu um 154 kg og eru því stærstu mörgæsirnar sem sögur fara af.

Það voru vísindamenn sem komust að þessu við rannsóknir á steingervingum sem fundust nýlega á Nýja-Sjálandi. Live Science skýrir frá þessu.

Vísindamenn fundu steingervinga dýra af þessari tegund og átta tegunda til viðbótar í kletti á strönd á Nýja-Sjálandi.

Þeir mátu þyngd dýranna út frá beinum þeirra og báru þau saman við þær mörgæsategundir sem nú eru uppi.

Rannsóknin hefur verið birt í vísindaritinu Journal of Paleontology.