Guðlaugur Þór Þórðarson, umhverfis- orku og loftslagsráðherra, var gestur Íþróttavikunnar með Benna Bó ásamt Herði Snævari Jónssyni, íþróttastjóra Torgs og þar var farið yfir víðan völl í íþróttaheiminum.

Það eru margir þingmenn áberandi stuðningsmenn ákveðinna liða í enska boltanum, Guðlaugur var spurður að því hvort skotin fengju að fljúga á þingi í tengslum við enska boltann.

„Já, það er algjörlega þannig,“ svaraði hann.

Benedikt Bóas spurði Guðlaug þá hvort hann væri til dæmis að skjóta á Willum Þór Þórsson þar sem hann væri stuðningsmaður Chelsea.

„Já, hann er samt alltof sanngjarn. Það er miklu auðveldara að stríða Bjarna í tengslum við Manchester United.

Nú vil ég samt sem áður helst ekkert ræða þetta við hann,“ og vísar Guðlaugur þar til stöðunnar hjá Liverpool, þar sem gengið hefur verið undir væntingum og Manchester United, þar sem liðið hefur verið á flugi undanfarið.

„Ég veit ekki hvað er að, guð er með svo sérkennilega kímnigáfu að ég á alveg ógeðslega mikið af vinum sem eru stuðningsmenn Manchester United.

Þetta hefur verið hræðilegt og var skelfilegt í áratug eða tvo, svo lagaðist þetta nú verulega og hugsaði alltaf, í hvert skipti sem ég var að stríða þeim að ég myndi fá þetta í bakið á mér. Ég gat samt ekki hætt.“

Nánari umræðu um Guðlaug Þór, Liverpool og enska boltann má sjá hér fyrir neðan: