Birtinga- og ráðgjafafyrirtækið Datera hefur ráðið Birnu Ósk Harðardóttur sem sérfræðing í birtingum hjá fyrirtækinu. Birna Ósk gengur inn í þéttan hóp reynslumikilla sérfræðinga hjá Datera, en stofan hefur farið vaxið ört á undanförnum árum. Birna Ósk mun liðsinna innlendum viðskiptavinum Datera við birtingar auk þess að sinna ráðgjöf í markaðsmálum. Kemur þetta fram í tilkynningu.

„Við erum einkar glöð að fá Birnu Ósk inn í reynslumikið teymi sérfræðinga hjá Datera. Við höfum verið að styrkja birtingarhlutann hjá okkur undanfarið og er ráðning Birnu liður í því,“ segir Hreiðar Þór Jónsson, framkvæmdastjóri Datera.

Birna Ósk hefur góða reynslu af markaðs- og birtingarmálum en áður vann hún sem birtingarstjóri hjá Billboard á Íslandi. Samhliða störfum hennar hjá Billboard starfaði Birna Ósk sem aðstoðarkennari í viðskiptafræðideild Háskóla Íslands. Birna Ósk hefur lokið B.Sc. gráðu í sálfræði, með viðskiptafræði sem aukagrein, í Háskóla Íslands auk þess sem hún er að ljúka M.Sc. gráðu í viðskiptafræði við sama skóla.

Datera er alhliða birtingahús sem sérhæfir sig í stjórnun árangursríkra og gagnadrifinna herferða, uppsetningu sjálfvirkra auglýsingaherferða, leitarvélabestun og alhliða ráðgjöf í markaðsmálum. Fyrirtækið nýtir nýjustu tæknilausnir á sviði stafrænnar markaðssetningar með það að markmiði að hámarka árangur og nýtingu markaðsfjár viðskiptavina. Hjá Datera starfa nú alls 12 sérfræðingar sem sinna verkefnum á þessu sviði fyrir innlendan og erlendan markað.