„Það er átakanlegt hversu ábyrg ég er orðin,“ segir tónlistarkonan Pink í forsíðuviðtali nýjasta tölublaðs People, en þar talar Pink um ástina, sorgina og móðurhlutverkið.
Hún talar um sjálfa sig sem rokkstjörnumömmu og segist hafa varið síðasta áratug í að ná jafnvægi milli stóru ástanna í lífi sínu: fjölskyldunnar og tónlistarinnar. „Þegar ég eignaðist börn sagði fólk: „Ferillinn þinn er búinn. Hvernig ætlarðu að ferðast?,“ segir Pink sem á dótturina Willow, 11 ára og soninn Jameson, sex ára, sem eiginmanni sínum Corey Hart.
&
View this post on Instagram
;
Pink hefur afsannað orð efasemdarmanna sinna. Orðin 43 ára er hún ein af vinsælustu tónlistarmönnum samtímans, hefur verið það til fjölda ára og hefur þroskast sem tónlistarmaður á eigin forsendum. Aðdáendahópur hennar er breiður, jafnt í aldri sem stétt.
Níunda platan nýútkomin
Þann 17. febrúar kom níunda plata hennar, Trustfall út, en Pink hefur selt meira en 60 milljónir platna um allan heim, náð 23 lögum á topp 40 lista yfir smáskífur, unnið þrenn Grammy-verðlaun og Emmy-verðlaun. Síðasta tónleikaferðalag var það tekjuhæsta hjá söngkonu (Madonna í toppsætinu). Framundan er síðan tónleikaferðalag í sumar í Bandaríkjunum, Pink Summer Carnival, og í haust hefst Trustfall tónleikaferðalagið.
„Ég var ekki viss um að ég myndi eignast fjölskyldu. Ég sá það ekki fyrir mér vegna þess að ég var hrædd um að ég yrði hræðileg móðir. En, guð minn góður, að vera mamma er það ótrúlegasta sem ég hef gert. Það er átakanlegt hversu ábyrg ég er orðin.“
People gerir orðaleik úr einu vinsælasta lagi Pink og segir hana hafa skipt um gír, í stað þess að starta partýinu, þá er hún orðin ábyrgi aðilinn sem sér um að allt fari fram með sómasamlegum hætti.
Líkt og oft vill verða með útivinnandi foreldra þá missir Pink af mikilvægum viðburðum barna sinna. Síðar á árinu mun hún verða á tónleikaferðalagi meðan leikrit sem dóttirin Willow leikur í verður sýnt. Segir Pink mæðgurnar hafa átt hjartnæmt samtal um stöðuna, hvað hún starfar við og að það sé erfitt sem móðir.
„Ég sagði henni að þetta væri glatað og ég myndi aldrei vera lengur en tíu daga í burtu í einu frá börnunum mínum, annars myndi ég hætta. Síðan spurði ég Willow hvað hún vildi að ég gerði. Og hún sagði að ég skyldi ekki hætta. Hún myndi sakna mín, en hún elskaði hvað ég starfa við. Og ég svaraði henni að ég elska líka það sem ég geri. Ég gjörsamlega dýrka það sem ég geri og ég ætla ekkert að afsaka það. Plús það að starfið mitt veitir börnunum mínum gott líf,“ segir Pink.
„Ég vil vera sú besta sem ég get verið í öllu sem ég geri, og það er aldrei nógu, gott, það er ómögulegt að verða það. En ég elska að vera mamma, elska tónlist og ég er heppin að geta gert alla þessa hluti. Ég er þakklát fyrir það á hverjum degi.“
