Berglind Hreiðars okkar ástsæli matarbloggari sem heldur úti síðunni Gotterí og gersemar kemur með fimmtudagsgleðina handa okkur að þessu sinni og býður upp á þessa sjúklega góðu vefjuvasa. Það má auðvitað leika sér með hráefnið sem ofan í þá er sett en þessi uppskrift steinliggur hjá Berglindi.

„Ég elska Taquitos og hef nokkrum sinnum gert slíkar rúllur. Það er hins vegar snilld að setja blönduna inn í svona vefjuvasa því þá er ekkert að leka út um annan endann og auðveldara að borða með því að halda á vasanum,“ segir Berglind.

Það er hægt að kaupa tilbúinn eldaðan kjúkling til að einfalda sér verkið og það er fljótlegt og gott að útbúa þessa dásemd. Það má líka gera sinn eigin kjúkling og rífa niður, fer allt eftir því hvað hverjum og einum passar og svo að sjálfsögðu tíminn sem viðkomandi hefur fyrir eldamennskuna.

Kjúklingavasar að hætti Berglindar Hreiðars

Fyrir 4

Kjúklingavasar

8 x Old El Paso Pocket vasavefjur

400 g rifinn,eldaður kjúklingur

120 g rifinn ostur að eigin vali

130 g rjómaostur við stofuhita

½ lime (safinn)

100 g Old El Paso salsasósa eða að eigin vali

2 msk. Old El Paso Tacokrydd eða að eigin vali

2 rifin hvítlauksrif

1 tsk. salt

3 msk. saxaður kóríander

Matarolía til penslunnar

Gróft salt

Hitið ofninn í 180°C. Takið til vasavefjur, kjúkling og ost, leggið til hliðar. Blandið öllum öðrum hráefnum saman í skál fyrir utan matarolíu og gróft salt. Þegar búið er að píska það saman má bæta rifnum osti og kjúkling saman við og skipta á milli vefjuvasanna. Raðið þeim næst á bökunarplötu, penslið með matarolíu og stráið smá grófu salti yfir. Setjið inn í ofn með álpappír yfir (svo vefjurnar brenni ekki) í um 10 mínútur, takið þá álpappírinn af og bakið áfram í um 5 mínútur eða þar til vefjuvasarnir gyllast vel. Berið fram með salsaídýfu (sjá uppskrift hér að neðan), guacamole og nachos flögum.

Salsaídýfa

70 g sýrður rjómi

70 g Hellmann‘s majónes eða majónes eftir smekk

130 g Old El Paso salsasósa eða salsa eftir smekk, má líka gera heimatilbúna

Pískið allt saman í skál og geymið í kæli fram að notkun. Fallegt er að strá söxuðu kóríander yfir í lokin en ekki nauðsynlegt.