Lögreglan í Lancashire-sýslu hefur staðfest að lík sem fannst í ánni Wyre í gær er af Nicola Bulley, tveggja barna móður á fimmtugsaldri, sem hvarf sporlaust við árbakkann þann 27. síðastliðinn þegar hún var í göngutúr með hundinn sinn.
Hvarf Bulley hefur heltekið bresku þjóðina undanfarnar vikur en þrátt fyrir umfangsmiklar leitir lögreglu, annarra viðbragðsaðila og jafnvel einkafyrirtækja, fannst hvorki tangur né tetur sem varpað gat ljósi á hvarfið.
Það breyttist í gær þegar að tveir einstaklingar komu auga á lík við árbakkann og gerðu yfirvöldum viðvart. Fjölskylda Bulley var þegar tilkynnt um fundin og síðan var hafist handa við að staðfestað sannarlega væri um líkamsleifar Bulley að ræða.
Það tók rúman sólarhring en fyrir stundu sendi lögregla frá sér yfirlýsingu það sem staðfest var að Bulley væri sannarlega fundin.
Í yfirlýsingu frá fjölskyldu Bulley kemur fram að ástvinir hennar séu miður sín eftir tíðindin. „Okkar versti ótti hefur verið staðfestur. Við eigum erfitt með að meðtaka hvað Nicola gekk í gegnum síðustu stundir sínar og við munum aldrei komast yfir það,“ segir meðal annars í tilkynningunni.
Þá fordæmir fjölskyldan hegðun bresku pressunnar í málinu en fréttaflutningur af því var gríðarlegur og áreitið á ástvini mikið. Þar á meðal voru fréttir þar sem ýjað var að því að barnsfaðir Bulley, Paul Ansell væri með óhreint mjöl í pokahorninu.
Eins og áður segir voru það tveir einstaklingar sem að tilkynntu lögreglu um líkið í ánni. Annar þeirra hefur nú stigið fram með yfirlýsingu en sá heitir Jason Rothwell, er 33 ára gamall og starfar sem miðill. Í yfirlýsingu sinni til breskra miðla segist hann sjálfur hafa ákveðið að nýta hæfileika sína til að leita að Bulley enda áður komið að því að aðstoða við mannshvörf.
Rothwell sagðist ekki vilja tjá sig með ítarlegri hætti um málið að svo stöddu en að hugur hans væri hjá ástvinum hinna látnu. Þá þakkaði hann lögreglu fyrir að koma fram við sig af virðingu og umburðarlyndi.
Undanfarna daga hafa ásakanir gengið í allar áttir um hversu illa hefur gengið að finna Bulley og rannsaka málið. Peter Faulding, sem rekur sérstakt fyrirtæki sem sérhæfir sig í leitum í vatni, hefur kennt lögreglunni um að lík Bulley hafi ekki fundist fyrr.
Faulding var kokhraustur þegar að fyrirtæki hans hóf aðkomu sína að leitinni og sagði öruggt að ef Bulley hefði fallið í ánna myndi teymi hans hafa upp á henni enda með rándýr tæki til brúks. Faulding og félagar þurftu þó að gefast upp á leitinni og í breskum miðlum í dag hefur hann kennt lögreglu um og sagt að yfirvöld hafi ekki óskað eftir að leita yrði á svæðinu þar sem líkið fannst.
Þá hefur lögreglan verið harðlega gagnrýnd fyrir að deila viðkvæmum persónuupplýsingum um Bulley á blaðamannafundi í síðustu. Þar kom fram að hún glímt við áfengisvandamál um skeið og væri auk þess komin með snemmbúin tíðahvörf.
Hefur almenningur og ýmsir stjórnmálamenn keppst við að fordæma lögregluna fyrir þessa upplýsingagjöf. Kallað hefur verið eftir óháðri rannsókn á vinnubrögðum lögreglu í málinu.
