Það hafa liðið 17 ár síðan að Arsenal flutti af hinum sögufræga Highbury leikvangi yfir á Emirates leikvanginn. Síðan þá hefur leikvangurinn verið vettvangur margra stórra leikja.

Að mati Charles Watts, blaðamanns Goal sem sérhæfir sig í málum Arsenal er leikur kvöldsins gegn Manchester City hins vegar stærsti leikur sem spilaður hefur verið á leikvanginum til þessa.

Fyrir leik kvöldsins, sem hefst klukkan 19:30, situr Arsenal í efsta sæti ensku úrvalsdeildarinnar með þriggja stiga forskot og leik til góða á Manchester City sem er í 2. sæti. Sigri City í kvöld kemst liðið á topp deildarinnar.

,,Það hafa átt sér stað stórar stundir á Emirates áður,“ skrifar Watts í grein á Goal. ,,Síðari leikurinn í undanúrslitum Meistaradeildar Evrópu gegn Manchester United árið 2009, sem og ógleymanlegir leikir gegn Barcelona í sömu keppni árin 2010 og 2011.“

Einhverjir myndu þá einnig benda á leikinn gegn Leicester City árið 2016 í ensku úrvalsdeildinni þar sem Welbeck tryggði Arsenal 2-1 sigur, eða jafnvel undanúrslitaleikinn gegn Atletico Madrid í Evrópudeildinni 2018.

,,Þetta eru allt stórleikir á sinn hátt en tilfinningin með þennan leik gegn Manchester City er á einhvern hátt stærri en þeir allir sem á undan hafa komið, jafnvel þó það verði enn 16 leikir eftir af tímabilinu í ensku úrvalsdeildinni hjá Arsenal að leikslokum í kvöld.“

Stórleikirnir hafi verið nánast daglegt brauð á hinum sögufræga Highbury en þeim dögum hafi hins vegar fækkað eftir komuna á Emirates.

,,Nú, þökk sé frábæru gengi undir stjórn Mikel Arteta á fyrri helmingi tímabilsins, eiga leikmenn tækifæri á að gera kvöldið að því merkasta í sögu leikvangsins til þessa.“

Sigur gegn Manchester City myndi þó ekki sjá til þess að titillinn endi í höndum Arsenal í ár.

,,Það sem sigur í kvöld gæti hins vegar gert væri að byggja upp trú á því að liðið gæti afrekað eitthvað sérstakt, eitthvað sem fáir höfðu trú á í upphafi tímabils.“

Grein Charles Watts á Goal má lesa í heild sinni hér.