Hlaðvarpsþátturinn Steve Dagskrá hóf þátt sinn í dag á því að spila lagið Bitch Better Have My Money með Rihanna. Tvær ástæður voru fyrir því.

Rihanna hóf hálfleikssýningu á NFL leik um helgina á þessu lagi og svo fylgdi saga með af íslenskum knattspyrnumanni sem hafði notað þetta lag til að fá laun sín greidd hjá félagi hér á landi.

„Ástæðan fyrir því að ég valdi þetta lag er að það var ónefndur fótboltamaður í ónefndu félagi, hann sendi linkinn á þetta lag. Youtube linkinn á launamanninn,“ sagði Andri Geir Gunnarsson annar af stjórnendum þáttarins.

Andri fór þá yfir þá staðreynd að íslensk félagslið eru oftar en ekki í vandræðum með að borga laun á réttum tíma.

„Eins og er vitað er eitt eða tvö lið sem borga fyrsta, hitt er ekki alltaf fyrsta. Það þarf að græja þetta, þarna var sendur linkur,“ sagði Andri sem ákvað að lokum að gefa upp hver leikmaðurinn er.

„Nú hefur rykið aðeins sest, ég ætla jafnvel að segja hver þetta var. Þetta var Guðmann Þórisson og ég ætla líka að láta það fylgja að hann var í FH,“ sagði Andri og greindi frá því að Guðmann Þórisson væri nú hættur í knattspyrnu.

„Bara linkurinn, ekkert meira.“

Guðmann er 36 ára gamall en hann fór í tvígang í atvinnumennsku. Þá lék hann með Breiðablik, FH, KA og Kórdrengjum hér á landi. Hann lék einn A-landsleik á ferli sínum.