Alishia Lehmann, leikmaður Aston Villa, vill að fleiri horfi á hana inni á knattspyrnuvellinum.

Svissneska landsliðskonan er orðin ansi stórt nafn utan vallar og á samfélagsmiðlum en hún vill einnig vera þekkt fyrir knattspyrnuhæfileika sína.

„Margir sjá aðeins hlið mína sem er á samfélagsmiðlum en ekki þá sem spilar fótbolta. Ég er stundum vonsvikin út af þessu þar sem ég legg mig mikið fram á hverjum degi,“ segir Lehmann.

„Ég er alltaf að segja fólki að horfa á leiki og þegar ég geri það kemur það þeim yfirleitt á óvart.“

Lehmann segir að leikmenn eigi að fá að spila eins og þeir eru.

„Ég vil senda þau skilaboð að þú getir verið hvernig sem er og spilað fótbolta. Málaðu þig, gerðu neglurnar þínar, augnhár og spilaðu fótbolta. Þú þarft ekki að velja.

Það er mjög mikilvægt að enginn breyti sér vegna þess að einhver annar segir þeim að gera það.“