Erik ten Hag stjóri Manchester United fagnar endurkomu Jadon Sancho í liðið en hann bjargaði stigi gegn Leeds i ensku úrvalsdeildinni í gær.
Um var að ræða fyrsta deildarleik Sancho frá því í október, kappinn hefur glímt við andlega erfiðleika sem hafði áhrif á líkamlega þáttinn.
Sancho fékk frí frá æfingum United og fór að vinna í sjálfum sér í Hollandi til að reyna að ná fyrri styrk.
„Hann er mættur aftur, ég er stoltur af honum. Ég styð hann, þjálfarateymið styður hann og leikmennirnir gera það líka. Núna þarf hann að gera það sjálfur líka,“ sagði Ten Hag.
„Þetta er í hans höndum, ef hann vill það þá getur hann það. Ég nýt þess að horfa á hann spila svona, með sjálfstraust og trú.“
„Við vitum vel að hann er magnaður leikmaður, hann á að geta haft áhrif í öllum leikjum. Hann þarf að leggja mikið á sig, það mun verða til þess að hann vill meira. Ég hafði gaman af þessu, sérstaklega fyrir hann. Þetta mun styrkja hann.“
