Danska skipaútgerðin A.P. Møller-Mærsk, sem er oftast einfaldlega nefnd Mærsk, birt í gær ársuppgjör sitt fyrir síðasta ár. Hagnaður samsteypunnar sló öll met en hann var 29,3 milljarðar dollara en það svarar til rúmlega 4.100 milljarða íslenskra króna.

Aldrei fyrr hefur danskt fyrirtæki hagnast svona mikið á einu ári.

Ekstra Bladet hefur eftir Mikkel Emil Jensen, sérfræðingi hjá Sydbank, að ástæðan fyrir þessum mikla hagnaði sé það sérstaka ástand sem var uppi í flutningageiranum á síðasta ári.

Neytendur hafi haft óvenjulega mikið fé til ráðstöfunar eftir heimsfaraldur kórónuveirunnar og af þeim sökum hafi verið óvenjulega mikil eftirspurn eftir flutningi á vörum um allan heim. Á sama tíma hafi verið óvenjulega langur biðtími í sumum höfnum og það hafi hækkað flutningsverðið enn frekar.