Rishi Sunak, forsætisráðherra Bretlands, ýjaði að því að ríkisstjórn hans gæti á næstunni skilgreint rússneska Wagner-herinn sem hryðjuverkasamtök. Þetta kom fram í ræðu Sunak á breska þinginu fyrr í dag þar sem hann var hvattur til þess að grípa til aðgerða gegn málaliðahernum miskunnarlausa.

Talið er að tugþúsundir málaliða Wagner-hersins séu á vígvellinum í Úkraínu og berast reglulega sögur af grimmd og miskunnarleysi þeirra. Eins og lesendur DV þekkja vel er eigandi hersins auðkýfingurinn Yevgeny Prigozhin, gjarnan nefndur Kokkur Pútíns, sem er einn af valdameiri og umdeildari mönnum Rússlands.

Mikill einhugur var innan breska þingsins um áframhaldandi stuðning við varnarbaráttu Úkraínumanna. Þingmenn í öllum flokkum kepptust við að lýsa yfir stuðningi sínum við baráttuna. Þá var við hæfi að forseti Úkraínu, Volodymyr Zelensky, brá sér í óvænta heimsókn til bandamanna sinna og ávarpaði breska þingið skömmu eftir ræðu breska forsætisráðherrans.

Lýsti Sunak yfir mikilli ánægju sinni með heimsókn úkraínska forsetans. „Hún er til marks um þá miklu vináttu sem ríkir milli þjóða okkar,“ sagði Sunak.

Ávarp Zelensky fór fram í Westminster Hall og varð forsetinn þar með fyrsti þjóðarleiðtoginn í rúman áratug til þess að ávarpa þingið í þessum elsta sal þinghússins.

Snerist ávarp forsetans að stórum hluta að biðla til breska þingsins að senda orustuþotur til Úkraínu. Það hafa Bretar og aðrir bandamenn verið tregir til að gera en Zelensky lagði þunga áherslu á að það væri lykillinn að áframhaldandi frelsi Úkraínu. Hlaut forsetinn úkraínski standandi lófaklapp að launum frá breskum þingmönnum og kæmi ekki á óvart ef að Zelensky verður að ósk sinni varðandi orustuþoturnar.