Þýska knattspyrnugoðsögnin Lothar Matthaus er allt annað en sáttur með markvörð og fyrirliða Bayern Munchen, Manuel Neuer, í kjölfar viðtals sem sá síðarnefndi fór í á dögunum.

Neuer fór í viðtal á dögunuym þar sem hann lét Bayern heyra það í kjölfar þess að félagið lét markvarðaþjálfarann Toni Tapalovic fara. Hann hafði gegnt stöðunni síðan 2011.

Tapalovic og Neuer eru miklir vinir og var sá fyrrnefndi til að mynda svaramaður í brúðkaupi markvarðarins.

Talið er að Julian Naglesman, stjóri Bayern, hafi viljað losna við Tapalovic þar sem upplýsingar væru stöðugt að leka úr búningsklefanum.

Í viðtalinu fór Neuer mikinn og sagði meðal annars að honum finndist eins og „hjarta hans hafi verið rifið út.“

Matthaus er goðsögn hjá Bayern og telur að Neuer eigi ekki að vera fyrirliði liðsins áfram. Þetta er í annað skiptið á skömmum tíma sem Neuer kemur sér í fréttirnar utan vallar. Hann fótbrotnaði á skíðum í vetur og verður frá út leiktíðina.

„Hann skíðaði af gáleysi og fer nú í viðtal án leyfis þar sem hann ræðst á klúbbinn,“ segir Matthaus.

„Það sem pirraði mig mikið er ýktu orðin sem hann notaði. Hjarta hans var rifið út. Eftir því sem ég best veit dó enginn, ekkert barn er alvarlega veikt. Það var starfsmaður látinn fara sem var náinn honum.“