Hreyfing fyrir fólk með „hreint blóð“ varð til eftir að heimsfaraldur kórónuveirunnar skall á. Í þessari hreyfingu er fólk sem segir að bóluefni gegn kórónuveirunni „mengi“ líkamann og að líkaminn „mengist“ ef fólk þiggur blóð úr bólusettum einstaklingi. En fyrir þessu færir þetta fólk engar sannanir.
Sumir í þessari hreyfingu hafa lagt til að stofnaðir verði sérstakir blóðbankar fyrir „hreint“ fólk, það er að segja fólk sem ekki hefur verið bólusett gegn kórónuveirunni.
Rétt er að hafa í huga að þetta er fámennur hópur en hann er hins vegar mjög hávær.
Nýlega kom upp mál á Nýja-Sjálandi tengt þessum hugsunarhætti. Þar vildu foreldrar ungabarns ekki heimila að það fengi blóðgjöf í tengslum við lífsnauðsynlega hjartaaðgerð ef blóðið væri úr bólusettri manneskju. Farið var með málið fyrir dóm sem kvað upp úr um að barnið gæti gengist undir aðgerðina og fengið það blóð sem þörf væri á, óháð úr hverjum það kæmi.
Málið sýnir hversu langt andstæðingar bólusetninga eru tilbúnir að ganga og vekur athygli á samsæriskenningum sem beinast gegn bóluefnum. Þetta segir Katrine Wallace, farsóttafræðingur og lektor við University of Illinois Chicago í Bandaríkjunum. TV2 skýrir frá þessu.
Hún leggur áherslu á að engar vísindalegar sannanir hafi komið fram sem styðja samsæriskenningar andstæðinga bólusetninga. Hún benti á að ef óbólusettur blóðþegi fær blóð úr bólusettum blóðgjafa hafi það ekki í för með sér að hann verði bólusettur.
En samt sem áður er til fólk sem trúir að svo sé og að þetta sé hættulegt.
Meðal þeirra er George Della Pietra frá Sviss. Hann stofnaði Safe Blood Donation samtökin sem reyna að tengja óbólusetta blóðgjafa saman við aðra með „hreint blóð“.
Á heimasíðu samtakanna kemur fram að þau starfi í Evrópu, Bandaríkjunum, Kanada, Ástralíu, Asíu og Afríku og telji bóluefni vera ógn við lýðheilsu. Meðlimirnir telja sig vera að vernda „framtíðina og mannkynið“.
