Sólveig Anna Jónsdóttir, formaður Eflingar, telur ljóst að ríkissáttasemjari, Aðalsteinn Leifsson, hafi brotið lög um stéttarfélög og vinnudeilur þegar hann boðaði miðlunartillögu sína í kjaradeilu Eflingar og Samtaka atvinnulífsins, en miðlunartillagan var kynnt fyrir helgi og hefur verið harðlega gagnrýnd.
Lögin áskilja að ríkissáttasemjara beri að ráðgast við samninganefndir aðila áður en tillaga er lögð fram.
Sólveig Anna rekur aðdraganda miðlunartillögunnar í færslu á Facebook en hún telur ljóst að þessu skilyrði laganna hafi ekki verið fullnægt.
„Rétt upp úr kl. 15 þann 25. janúar fékk ég af því fregnir frá manni ótengdum Eflingu sem starfar í verkalýðshreyfingunni að Aðalsteinn Leifsson ríkissáttasemjari væri í húsakynnum embættisins að ræða við aðila óviðkomandi Eflingu um að hann ætlaði sér að leggja fram miðlunartillögu í kjaradeilu Eflingar og Samtaka atvinnulífsins.“
Sólveig Anna segist strax hafa brugðist við þessum tíðindum og klukkan 15:17 hafi hún sent ríkissáttasemjara tölvupóst þar sem hún spurði hvort þetta væri rétt.
„Klukkan 16:28 fékk ég svar frá ríkissáttasemjara þar sem hann sagði m.a.: „Ég hef, hins vegar, ítrekað verið spurður af því – m.a. af fólki í öðrum stéttarfélögum sem eru hér á fundum í ýmsum öðrum málum – hvort miðlunartillaga kynni að vera til lausnar deilunnar.“„“
Í kjölfar þessa svars hafi Sólveig Anna rætt við Aðalstein í gegnum síma og þar hafi hann endurtekið að fulltrúar annarra stéttarfélaga hefðu rætt við hann um möguleikann á miðlunartillögu, eins hefðu blaðamenn nefnt það og hann hefði jafnvel fengið skilaboð um það á Facebook.
„Hann fyrirskipaði mér svo að koma á fund með mjög stuttum fyrirvara. Ég sagðist ekki geta borðað samninganefnd félagsins á fund með svo stuttum fyrirvara, sökum þess að hún væri mönnuð fólki sem væri í vinnu og þyrfti í það minnsta smá fyrirvara til að fá leyfi frá vinnu.“
Þessu hafi Aðalsteinn ekki sýnt skilning heldur hótað að gríða til „ótilgreindra aðgerða“ gegn Sólveigu ef hún kæmi ekki á fundinn.
„Á fundinum sem haldinn var morguninn eftir, 26. janúar kl. 9:30,., afhenti ríkissáttasemjari mér fullbúna miðlunartillögu ásamt skjali um „framkvæmd og fyrirkomulag atkvæðagreiðslu um miðlunartillögu ríkissáttasemjara“. Á fundinum reyndi ég aftur að segja við ríkissáttasemjara að sú miðlunartillaga sem hann ætlaði sér að þröngva upp á Eflingu fæli í sér að Eflingar-fólk fengi allt að 20.000 krónum lægri hækkanir en miðlimir í öðrum SGS félögum, vegna mjög ólíkrar samsetningar félagahópsins.“
Aðalsteinn hafi ekki brugðist við þeim athugasemdum og ekki sýnt neinn vilja á að taka tillit til þeirra. Sólveig segist hafa eytt klukkutíma í að reyna að koma honum í skilning um „hversu hræðileg og röng ákvörðun hans væri“.
Í lok fundar hafi Sólveig spurt hvort hann myndi birta tillöguna opinberlega.
„Hann svaraði að það yrði seinna um daginn. Þegar ég gekk út af fundinum varð mér ljóst að ríkissáttasemjara lá á að losna við mig úr húsi vegna þess að hann var að hefja blaðamannafund kl. 11 til að segja þar öllum frá miðlunartillögu sinni.“
Sólveig segir að ljóst sé af ofangreindu að ríkissáttasemjari hafi aldrei ráðgast við hana eða samninganefnd Eflingar. Hann hafi hins vegar rætt þessa fyrirætlan sína við fjölda annarra, svo sem á kaffistofu embættisins við aðra formenn félaga innan ASÍ.
„Hann hefur vafalítið rætt miðlunartillöguna við fulltrúa SA enda er hún að öllu leyti samhljóma síðasta tilboði SA til Eflingar en inniheldur ekkert af kröfum Eflingar. Eina ástæðan fyrir því að hann kallaði mig á fund var sú að ég hafði við hann samband eftir að ég hafði frétt af tillögunni frá þriðja aðila. Þetta eru allt staðreyndir sem enginn getur hrakið“.
Augljósa niðurstaðan sé sú að ríkissáttasemjari hafi brotið lög. Telur Sólveig að Aðalsteinn hafi mögulega talið að þar sem forysta Eflingar væri umdeild þá kæmist hann upp með þessa framkomu.
„En þar hafði hann rangt fyrir sér. Hann mun ekki komast upp með tilraun sína til að svipta Eflingu sjálfstæðum samningsrétti. Það mun aldrei gerast.“
