Framherjinn Wout Weghorst er þegar farinn að tala um að vera lengur hjá Manchester United en út þetta tímabil.
Hollendingurinn er á láni frá B-deildarliði Burnley, en hann var á láni hjá Besiktas í Tyrklandi fyrir áramót.
„Nú er staðan eins og hún er, þetta er lán. Þetta er risastórt félag og ég mun leggja mig allan fram. Ef það gengur verður þetta góður valkostur,“ segir Weghorst.
Erik ten Hag mátti aðeins styrkja sig með ódýrum framherja eða manni á láni í janúar en í sumar er hann talinn vilja stærra nafn. Harry Kane hefur til að mynda verið nefndur til sögunnar.
Weghorst ætlar að fá Ten Hag til að efast um þær áætlanir.
„Ég hef séð á fyrstu dögum mínum hér hversu stórt félag þetta er. Aðstaðan, félagið og gæðin í liðinu, hvernig við spilum. Það eru mikil gæði í öllu og þú vilt vinna á svoleiðis stað.“
Weghorst skoraði sitt fyrsta mark fyrir United gegn Nottingham Forest í enska deildabikarnum í vikunni.
„Fyrsta vikan gekk vel og það er undir mér komið að koma með eitthvað að borðinu og vera eins góður og ég get.“
