Einar Bárðarson, framkvæmdastjóri Votlendissjóðs með meiru, segir í færslu á Facebook í dag að honum hafi borist nokkrar ábendingar í morgun um að hann sé að bjóðast til að gefa fólki peninga.

„Þetta er ekki ég, en einhver hefur búið til „spegill” af mér greinilega og hann er að senda þetta,” segir Einar og segir að hann hafi tilkynnt gerviprófílinn með réttum leiðum og búið sé að taka hann niður. 

Í samtali við DV segist Einar ekki vita hvort gerviprófílinn hafi kommentað undir margar færslur og þá hversu oft. „Ég hef fengið töluvert af ábendingum en það er væntanlega bara brot. Við erum heppin með það hérna á Íslandi að íslenskan þvælist fyrir þeim og kemur upp um þá ennþá.” 

Einar segir að það sé í lagi með hans eigin aðgang á Facebook, „Þessi draugur hefur verið barinn niður nema það séu merki þess þarna úti að ég vilji gefa peninga eftir klukkan 9:00 í morgun. Það er auðvitað gaman ef ég gæti gefið peninga, en þetta eru innantóm loforð því ég á ekki mikið af þeim,”  segir Einar hress í bragði. „Fólk má vera duglegt að reporta þennan „tvíbróðir” minn þannig að hann þurrkist bara út. Ég væri þakklátur því. Ég á ekki meiri gjafir.”