Það eru fæstir sem verða hæstánægðir við það að fá umferðarsekt. Richard Arnold, karlmaður frá áströlsku borginni Goald Coast, fékk einmitt eina slíka í síðasta mánuði en það var ekki sektin sjálf sem gerði hann brjálaðan, heldur myndin sem fylgdi með sektinni.

Þegar Arnold opnaði sektina sem hann fékk í póstinum sá hann myndina sem eftirlitsmyndavélin hafði tekið af honum og eiginkonu hans, Anh Nyugen. Nyugen var með fæturnar uppi á mælaborðinu þegar myndavélin smellti af og sást upp undir pilsið hennar og í nærbuxurnar. Á annarri mynd sem fylgdi sektinni sást svo að Nyugen var ekki með bílbeltið sitt rétt á sér, að sögn Arnold hafði hún tekið hendina sína úr beltinu til að laga skyggnið sitt í örfáar sekúndur.

Sektin sem Arnold fékk hljóðar upp á 1.078 ástralska dollara, eða um 108 þúsund í íslenskum krónum. Ljóst er að hann vill ekki borga sektina því hann hefur ákveðið að áfrýja henni. „Þú getur ekki búist við að fá sendar myndir af nærfötum eiginkonu þinnar,“ segir Arnold í samtali við Gold Coast Bulletin um málið.

„Ég held að það sé í rauninni ólöglegt að taka mynd upp undir pils. Eftirlitsmyndavélar ættu ekki að vera notaðar á svona ónærgætinn og dónalegan hátt.“

Talsmaður samgöngustofnunarinnar í Queensland, Ástralí, segir að myndir frá eftirlitsmyndavélum séu dulkóðaðar og varðveittar örugglega. Þá segir hann myndirnar einungis vera notaðar við löggæslu. Gervigreind sjái um að nema hvort verið sé að fremja lögbrot á myndunum sem eftirlitsmyndavélarnar taka. Ef gervigreindin finnur ekki lögbrot á myndunum þá er þeim eytt en annars fara þær áfram til lögreglunnar sem fer yfir hvort að um brot sé að ræða.