Þeir gerast ekki mikið stærri gestirnir en sá sem fenginn var í Íþróttavikuna með Benna Bó í þetta skiptið. Forseti Íslands, Guðni Th. Jóhannesson, sat þá í setti ásamt Herði Snævari Jónssyni, fréttastjóra íþrótta á Torgi.
Enski boltinn var til umræðu. Guðni heldur með Manchester United en er mjög hrifinn af því sem er í gangi hjá toppliði Arsenal.
„Ég dáist að Arsenal. Þar á bæ ákvað fólk greinilega að vinna eftir einhverju langtímaplani. Gefa Arteta smá tíma til að búa til lið. Auðvitað fá þeir leikmenn til sín. Það er happdrættisvinningur að fá Ödegaard en það koma líka leikmenn úr unglingastarfinu þar,“ segir forsetinn.
„Það er nánast borin von að United beri sigur úr býtum í deildinni en sem almennur áhugamaður um knattspyrnu vona ég að það verði Arsenal. Það er hluti af þessu sporti að peningar geta skipt sköpum. Ég er ekki að segja að Arsenal sé lítið félag en þeir eru samt ekki vaðandi í seðlum eins og ónefnd önnur lið þarna. Ég held það verði gott fyrir íþróttina að þeir nái að fara alla leið.“
Umræðan í heild er hér að neðan.
