Þeir gerast ekki mikið stærri gestirnir en sá sem fenginn var í Íþróttavikuna með Benna Bó í þetta skiptið. Forseti Íslands, Guðni Th. Jóhannesson, sat þá í setti ásamt Herði Snævari Jónssyni, fréttastjóra íþrótta á Torgi.

Á dögunum var greint frá því að ný 15 milljarða þjóðarhöll væri í kortunum fyrir landslið Íslands í innanhúsíþróttum. Þjóðarhöll og þjóðarleikvangur voru til umræðu í þættinum.

„Hin blákalda staðreynd er sú að verði ekki komin ný íþróttahöll fyrir inniíþróttir innan 5-7 ára fylgir sögunni að lið Íslands í þessum íþróttum munu ekki geta háð sína heimaleiki á íslenskri grundu. Það er hin blákalda staðreynd,“ segir Guðni.

Hann bendir á að fjöldi íþróttafélaga hafi glæsileg hús og það sama ætti að vera hægt í Laugardal.

„Innan tíu kílómetra radíus við mitt heimili eru íþróttamannvirki sem kosta samtals yfir tug ef ekki tvo tugi milljarða, knatthallir, íþróttahús, glæsileg mannvirki.

Staðreyndir málsins eru að höllin sem við höfum er komin til ára sinna og fáum við ekki nýja höll munu lið okkar ekki geta leikið sína leiki á Íslandi.“

Guðni segir ríki og borg verða að ná saman.

„Við höfum átt efni að byggja hér íþróttamannvirki. Nú er það ríkis og Reykjavíkurborgar að ná að lokum saman um kostnaðarskiptingu. Það virðist vera þröskuldurinn sem er dálítið erfitt að komast yfir núna. Við hljótum að láta það traust á ráðamenn við það borð að niðurstaða náist.“

Hörður tekur til máls. „Þetta er löngu tímabært. Laugardalshöll í dag stenst engar kröfur og er nánast hættuleg. Þetta er bara slysagildra.

Þegar þetta er klárt þarf að fara að huga að Þjóðarvelli því hann hefur einnig verið að fá gulu spjöldin frá UEFA. Karlalandsliðið býr til dæmis við það að byrja undankeppni á tveimur útileikjum og enda á tveimur útileikjum. Sem gerir stöðuna flóknari þegar liðið er að reyna að komast inn á stórmót.“