Poppstjarnan Britney Spears ræðir venjulega ekki um fyrrverandi kærasta sinn og söngvarann Justin Timberlake.
Britney og Justin voru um tíma heitasta stjörnuparið í Hollywood. Þau kynntust við tökur á Mickey Mouse Club í byrjun tíunda áratug síðustu aldar. Þau byrjuðu saman árið 1999 og voru parið sem allir elskuðu, þar til þau hættu saman mjög opinberlega árið 2002.
Sambandsslitin voru dramatísk og gaf Justin út lagið „Cry Me a River“ í kjölfarið. Aðdáendur þeirra skiptust í fylkingar og var Britney gerð að „vonda kalli“ sambandsslitanna.
Söngkonan birti gamla mynd af henni og Justin frá því að þau voru saman. Hún skrifaði með: „Þegar við vorum í körfubolta saman, þá gerðust kraftaverkin!“
Hún eyddi myndinni stuttu seinna. E! News greinir frá.
Það eru tvö ár liðin síðan Justin bað hana afsökunar, skömmu fyrir frumsýningu heimildarmyndarinnar Framing Britney Spears.
Hann bað einnig söngkonuna Janet Jackson afsökunar, vegna atviksins í hálfleik Ofurskálarinnar, og viðurkenndi að hann hefði átt að bregðast öðruvísi við.
„Ég brást ykkur og mörgum öðrum. Ég græddi á kerfi sem viðurkennir kvenhatur og rasisma,“ sagði hann.
Afsökunarbeiðnina má sjá hér að neðan.
View this post on Instagram
